|
Sa darveir per novas tgossas
Scuntrada e furmaziun
08.09.2004 - 09:22
pb. Essend tgi ins stueva gio oz dar decisiuns concernent igl program da cant 2004/05 ò igl Chor viril Surses gio gia dumengia passada sia radunanza generala. Blera lavour e novas provocaziuns spetgan igl onn proxim.
Mecta exact 30 commembers èn cumparias agl Hotel da Sport a Pulens. An sies rapport annual ò Pauli Dosch, igl president digl Chor viril Surses, menziuno, tgi igl chor vegia per gronda part realiso las racumondaziuns musicalas digl dirigent e cotras ins vegia er gia success e pudia cuntantar ferm igl auditori tar igls concerts ed er augmentar igl domber.
Igl chor è pero sa fatschanto angal curtamaintg cun igl passo e drizzo dalunga igls sies interess anavant vers novas fegnameiras. E chegl er cun diversas midadas persunalas tar igls funcziunaris.
Dus novs vicedirigents
I saro 14 onns tgi Stefan Demarmels e Rudi Netzer on exequia l’impurtanta missiun da vicedirigents. Chegl vot deir da ramplazzar igl dirigent an cass dad absenza ed anc pi impurtant da manar las provas da register. Stefan Demarmels veva gia demissiuno gio avant en onn essend sortia digl chor. Rudi Netzer fiss er gugent tschasso da chel post. Igl onn passo era en vicedirigent vacant e Rudi Netzer è sto segl post. La vacanza è betg stada schi noscha, essend tgi igl dirigent reiva tar mintga prova, pero per anavant erigl da vurdar per ena schliaziun. E chella para dad esser cattada an cuntantientscha da tots. Igl Chor viril Surses dispona ossa da nov da dus vicedirigents giovens, coliias ferm cun igl chor e cun grond interess per cant e musica: Rudi Collet da Riom e Romeo Wasescha da Savognin.
Rudi Collett era anfignen ossa er commember da suprastanza scu vicepresident. Lò ò el stuia neir ramplazzo e chegl antras Domenic Sonder da Salouf. Demissiuno an suprastanza veva er Flavio Spinas tgi è sortia digl chor perveia da midada da li da lavour. Per el è nia eligia Armando Janett da Tinizong. Igls oters funcziunaris èn stos segl post.
Filip Dosch, igl cassier ò preschento en bung chint cun en avanzamaint da 4’749.– fr. ed en capital da bung 20’000.– fr. El tigna er chint dalla frequenza dallas provas. Cun ena participaziun an media da 91.78% e la mesadad digls cantadours tgi on mantgea nignas u angal ena prova dastga la disciplina da provas neir taxada scu fitg bunga.
En retg program
Ed alloura ins ègl nia tar igl principal dalla radunanza, numnadamaintg tar la preschentaziun digl program per igl onn da cant vegnent. Luzius Hassler, igl dirigent ò constato tgi igls concerts digl onn passo cun bleras tgossas differentas vegian catto bung resung tigl publicum ed uscheia ins vot cuntinuar. Igl puncts central digl nov onn da cant èn puspe igls concerts da Pasca. Cò dattigl en bloc cun canzungs pitost tradiziunalas, pero er cumposiziuns novas, uscheia egna da Curò Mani, igl dirigent antecessour da Luzius Hassler.
Igl sagond bloc cumpeglia canzungs pi modernas per part er an oters lungatgs. Igl dirigent è persvadia tgi cun tgossas pi novas ins stò d’ena vart far ena concessiun agl auditori e da l’otra vart ins contanscha forsa pi tgunsch novs cantadours giovens.
An igl terz bloc ins turna tar la classica cun divers chors dad operas.
En festival da chors
Radio e televisiun svizra ansemen cun la Banca Raiffeisen scu sponsor fon igl 2005 en festival da chors. Ensatge sumigliant scu tgi è nia fatg igl anviern passo tar igl «MusicStar», angal per chors. Igl Chor viril Surses è sa decidia da sa participar. I funcziunescha uscheia, tgi igl chor duess cantar ena canzung rumantscha cumponeida avant igl onn 2000, siva ena nova canzung rumantscha e la terza duess esser ena canzung estra. Igl amprem dattigl ena runda locala per igl Grischun central. Tot tenor igl domber d’annunztgas annunztgas fiss chella a Lantsch u a Salouf u er an tots dus lis. La runda regiunala fiss alloura igls 18 da favrer 2005, pero è igl li anc betg fix. Igl final è igls 29 da matg a Turitg an la «Tonhalle» e vign emessa «live» dalla televisiun svizra. Per rivar ainten la proxima runda valigl da sa qualifitgier e cò funcziunescha chegl er cun igl «telefon-voting».
I duess betg dar provas supplementaras persiva, pero less Luzius Hassler far ensatge an direcziun «performance» cun chor, chegl seia oz simplamaintg basignevel dad esser avert per tgossas novas, gist per talas occurenzas.
Igl veir muteiv tgi la radunanza è gio stada schi bod è stada la decisiun definitiva per sa participar ad en concert a Basilea igls 30 da zarcladour 2005. Chegl fiss en concert communabel cun igl chor viril da pulizeia da tots dus mezs cantuns da Basilea e cun igl chor viril svizzer dad Edmonton (Canada). Chel chor è gist chel mument sen visita a Svizra. Igl Chor viril Surses è sa decidia da sa participar e cumbinescha igls concerts cun ena viadi an igl conturn da Basilea, p.ex. Schwarzwald.
Alla fegn è nia do diversas infurmaziuns an connex cun igl program per igl onn da giubileum «100 onns Chor viril Surses» igl 2007.
Legenda:
Novs funcziunaris tar igl Chor viril Surses: (da san.) Romeo Wasescha, vicedirigent tenors, Rudi Collet, vicedirigent, bass, Armando Janett e Domenic Sonder, novs suprastants.
| 
